Chronique d'Enguerrand de Monstrelet - index L.II-16- [Comment messire Jehan de Luxembourg asséga le chastel de Wieghe, et comment il fist une embusche, où Pothon de Sainte-Treille et ses compagnons furent desconfis.]

n ce temps, messire Jehan de Luxembourg asséga la forteresse de Wieghe (1) très puissamment. Lequel siège dura environ trois semaines, continuant tousjours ledit de Luxembourg de faire abatre et dérompre par ses engins icelle forteresce. Et enfin lesdiz asségez non espérans avoir souscours, firent traicté avec ledit de Luxembourg, par tel si qu'ilz s'en yroient sauf leurs vies, en délaissant tous leurs biens, promectans d'eulx non plus armer deçà la rivière de Loire, sinon en la compaignie du roy Charles. Après lequel traicté se départirent en alant à Guise, et la forteresce fut démolie et abatue. Et après, le premier ou second jour ensuivant, ledit messire Jehan de Luxembourg se deslogea avec aucuns de ses plus féables.

  En ce temps, fut Pothon de Saincte-Treille prins, si comme vous orrez. Je vous di que messire Jehan de Luxembourg durant ledit siège se mist en embusche derrière une petite église, envers les marches de Guise, pour veoir et pour actendre se aucuns de ses ennemis feroient aucune envaye envers ses gens. Laquelle chose advint comme il l'avoit proposée. Car ledit Pothon de Saincte-Treille, Lestandart de Milly, le seigneur de Verduisant et aucuns autres expers et esprouvez en armes, saillirent hors de la ville de Guise, en venant vers ladicte embusche. Et adoncques ledit de Luxembourg, véant sur eulx son advantage, à tout les siens, ala vigeureusement contre eulx; et tantost par grant vigueur les mist en grand desroy. Et y fut prins ledit Pothon, le seigneur de Verduisant et aucuns autres, en petit nombre. Mais ledit Estandart de Milly, de plaine venue assist sa lance dessus Lyonel de Vandonne, si le porta jus de son cheval et le blessa très durement vers l'espaulle, tant que ledit Lyonel de son vivant en fut affolé de bras et de jambe. Après lequel cop icelui Estandart voiant que proesce n'y povoit riens valoir et que ses ennemis estoient trop fors, se trahit vistement dedens la ville de Guise. Et messire Jehan de Luxembourg avecques ses gens chassa longuement les autres, qui s'en fuyoient en plusieurs parties. Et après retourna et assambla ses gens, en menant grant leesce de la bonne adventure qui lui estoit advenue, et ainsi, à tout ses prisonniers, retourna en son chastel de Beaurevoir, donnant congié à ses capitaines jusques à son rappel.

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)

Notes :
1 Wiege (Aisne).