Chronique d'Enguerrand de Monstrelet - index L.I-239 - [Comment le seul fils du roy de France, Charles, Daulphin de Vienne, fut appellé à la table de marbre. Et la prinse du seigneur de Lisle-Adam en la ville de Paris par le duc d'Excestre, Anglois.]

tem, en cest an, le roy Henry d'Angleterre, avant qu'il se partist de Paris pour repasser la mer, fist convoquer et appeller le duc de Touraine à la table de marbre, et après que furent faictes toutes les solempnitez acoustumées en ce cas contre lui et ses complices, pour le crime fait en la personne du duc Jehan de Bourgongne, pour tant que ausdictes appellacions ne ala, ne envoia, fut par le conseil royal et par la court de parlement, banny du royaume et jugé indigne de succéder à toutes les seigneuries venues et à venir, et mesmement de la succession et actente qu'il avoit à la couronne de France, non obstant que d'icelle feust vray héritier après le trespas du roy Charles son père, selon les coustumes anciennes de ce noble royaume. Duquel déboutement et bannissement plusieurs Parisiens furent très-joieux, car moult le doubtoient.
  En après, le duc d'Excestre, qui estoit capitaine de Paris, pour certaines causes qui à ce le meurent, fist prendre en icelle ville le seigneur de L'Isle-Adam par aucuns de ses Anglois. Pour laquelle prinse s'assemblèrent jusques à mil hommes ou plus du commun de Paris pour le rescourre de ceulx qui l'emmenoient en la bastille Saint-Anthoine. Mais tantost ledit duc d'Excestre, à tout cent vingt combatans ou environ, dont la plus grant partie estoient archers, ala férir en eulx et fist tirer les dessusdiz archers au travers desdictes communes. Pour quoy, tant par la crainte dudit traict, comme par commandement qu'il leur fit de par le Roy, se retrahirent assez tost en leurs maisons, et ledit seigneur de L'Isle-Adam fut, comme dit est, mis en prison et y demoura durant la vie du roy Henry d'Angleterre. Lequel l'eust fait mourir, se n'eust esté la requeste du duc de Bourgongne.

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)

Notes :
/