Chronique d'Enguerrand de Monstrelet - index L.I-240 - [Comment le duc Thomas de Clarence fut desconfit et occis par les Daulphinois emprès Baugy, où il y eut perte et dommage des deux parties.]

tem, en la fin de ceste année, droictement la nuit de Pasques, Thomas, duc de Clarence, qui estoit capitaine général de toute Normendie, après le département du roy son frère avoit mené son ost vers le pays d'Anjou, où estoient assemblez en très grant nombre les Daulphinois, c'est assavoir le conte de Bosqueaulx, connestable du Daulphin, et le seigneur de La Faiète, avec plusieurs autres, pour iceulx combatre et subjuguer. Advint que, cedit jour, ledit duc de Clarence oy certaines nouvelles que ses ennemis estoient assez près de lui, en une ville nommée Baugé ou Baugi en Anjou (1) et pour tant, incontinent ledit duc, qui moult estoit renommé en armes, print sans délay une grant partie de tous ses meilleurs hommes, et par espécial à peu près tous ses capitaines, à tous lesquelz, moult asprement il ala envayr ses ennemis et commencer bataille merveilleuse et dure et moult ensanglantée. Et toute la grant tourbe de son ost le suivait de loing, à très grant peine et danger, pour le mauvais pas d'une rivière qu'il leur convenoit passer. Et d'autre part les gens du Daulphin dessusdit, qui bien estoient pourveuz et advisez de ce qu'ilz devoient faire, sachans la venue de leurs adversaires, commencèrent à combatre très hardiement contre les dessusdiz Anglois, et tant que des deux parties y eut merveilleuse et cruelle assemblée. Mais, en la conclusion, les Daulphinois conquirent la place et eurent victoire contre les Anglois. Et furent occis et mis à l'espée, sur le champ, ledit duc de Clarence, le conte de Kent, le seigneur de Ros, mareschal d'Angleterre, et généralement toute la fleur de la chevalerie et gentilesse dudit duc, avec deux à trois mille combatans anglois. Et avec ce furent prins le conte de Sombresel, le conte de Hontiton, le conte du Perche en Normendie, avecques deux cens autres de leurs gens ou environ. Et de la partie du Daulphin y furent mors de mil à douze cens hommes. Entre lesquelz y mourut ung vaillant chevalier, nommé Charles le Boutiller, et avecques lui messire Jehan de Fontaines, Yvorin et Guérin de Fontaines, messire Jehan de Passavant, messire Jehan de Bresle, messire Jehan Tost-Avant et plusieurs notables et vaillans hommes d'armes jusques, au nombre dessusdit. Et fut de ce jour en avant celle assemblée nommée la bataille de Baugy. Pour la mort et desconfiture desquelz Anglois, tous les autres eurent très grant tristesse et par espécial pour le duc de Clarence, car moult estoit aymé pour sa prudence. Néantmoins, entre eulx Anglois, qui estoient soubz la conduite du conte de Salisbery, reconquirent le corps dudit duc, lequel depuis fut porté en Angleterre, où il fut enterré à tès grant solennité.

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)

Notes :
1 Baugé (Maine et Loire).