Chronique d'Enguerrand de Monstrelet - index L.I-243 - [Comment le roy Henry d'Angleterre retourna en France à grant puissance pour aler contre le Daulphin.]

tem, après que ledit roy d'Angleterre eut ordonné ses besongnes en son royaume et que toute son armée fut preste autour de Cantorbie, et iceulx payez de leurs souldées pour huit mois, s'en vint à Douvres, et là, en autres pays voisins, lui et toutes ses gens entrèrent en mer dedens leurs vaisseaulx, au point du jour la veille de saint Barnabé (1), et, en ce mesme jour, entrèrent ou havre de Calais, environ deux heures après midi. Et adonc le roy yssi de sa barge et se loga en son chastel, oudit lieu de Calais. Et semblablement tous les autres, yssans de leurs vaisseaulx, furent logez, tant en la ville comme ès lieux voisins, selon l'ordonnance du roy et de ses fourriers. Et tantost après que lesdiz vaisseaulx furent deschargez, le roy les envoya en Angleterre. Et, comme il fut extimé par plusieurs notables hommes en ce coignoissans, il y descendi pour ce jour de trois à quatre mille hommes d'armes et bien vingt quatre mille archers. Et lendemain, qui fut le jour de saint Barnabé, ledit roy fist partir le conte Durset et le baron de Clifort pour aler à Paris conforter et aider le duc d'Excestre, son oncle, et les Parisiens, qui pour lors estoient moult court tenus de vivres, pour les garnisons des Daulphinois qui estoient entour d'eulx. Et menèrent les dessusdiz, douze cens combatans, à tout lesquelz chevauchèrent hastivement, eschevans les agais de leurs enemis, jusques audit lieu de Paris, où ilz furent moult joieusement reçeus, tant pour leur venue comme pour les nouvelles qu'ils povoient prendre de la descendue de leur roy, d'Angleterre, auquel lesdiz Parisiens avoient par plusieurs foiz transmis leurs messages en Angleterre pour le haster. Car le duc de Touraine, Daulphin, avoit pour ce temps assemblé de plusieurs pays très grant puissance de gens d'armes, à tout lesquelz se tira pour aler vers Chartres. Et se rendirent à lui les villes de Bonneval, de Galardon, avec autres fortresses, lesquelles il garny de ses gens, et puis s'en ala loger au plus près de la cité de Chartres, l'asséga tout autour très puissamment, mais elle fut fort défendue par le bastard de Thien et autres capitaines, lesquelz hastivement y avoient esté envoiez de Paris pour secourir à ladicte cité. Et, comme il fut extimé par gens en ce

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)

Notes :
1 Le 10 juin.