Chronique d'Enguerrand de Monstrelet - index L.I-250 - [Comment les besongnes s'espandirent de ceste matière en divers lieux ; la prinse de Douvrier, et le parlement que feit le duc de Bourgongne de la ville de Hesdin.]

tem, lendemain de la victoire du duc de Bourgongne furent les nouvelles portées en divers lieux, dont ceux qui tenoient son party eurent grant joye et par especial à Monsterueil et ou pays à l'environ. Après lesquelles nouvelles oyes, messire Jehan Blondel, qui naguères estait retourné de la prison des Anglois, assembla aucuns gentilz hommes du pays, entre lesquelz estait messire Olivier de Brimeu, moult ancien chevalier, et aussi plusieurs capitaines et compaignons, tant de ladicte ville de Monsterueil comme d'ailleurs, lesquelz il mena devant le chastel de Douvrier que tenoient les gens de Pothon de Saincte-Treille. Auxquelz il parlementa et les servy de si belles et subtilles paroles qu'ilz furent contens de lui rendre ladicte fortresse, par condicion qu'il les feroit conduire saulvement jusques à Saint-Riquier, et ainsi en fut fait. Après il le regarny de ses gens pour tenir frontière contre les Daulphinois.
  En après, ledit duc de Bourgongne, quant il ot assises ses garnisons comme dit est contre ses adversaires, il se party de Hesdin et s'en ala à Lisle et de là en Nostre-Dame de Haulz, et puis retourna en Flandres, où il séjourna assez bonne espace de temps pour entendre aux besongnes d'icellui pays.

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)

Notes :
1 Hall dans le Hainaut.