Chronique d'Enguerrand de Monstrelet - index L.II-35- [Comment la duchesse Jaqueline de Baviere se parti et embla de la ville de Gand, et s'en alla au pays de Holande.]

tem, la duchesse Jaqueline de Bavière estant en la ville de Gand comme dict est, après qu'elle y eut esté certaine espace de temps, non contente de ce que ainsy estoit détenue oultre sa voulenté, ung jour regarda et advisa, environ l'entrée du mois de septembre, comment elle se pourroit de là partir. Et en fin, en tant que ces gens soupoient, elle, vestue en habit, une femme pareillement habillée et deux hommes avecques elle, se départi de ladicte ville de Gand à cheval, et chevaulcha bien en haste jusques en Anvers, où elle reprint habit de femme, et sur ung char s'en ala à Breda et depuis à La Garide, où elle fut obyée honnourablement comme dame. Et adonc, ordonna le seigneur de Montfort son principal gouverneur. Et manda plusieurs nobles barons du pays de Hollande pour avoir conseil avec eulx sur ses affaires. Et lors, assés brief ensievant, vint à la cognoissance du duc de Bourgongne le département de ladicte duchesse, dont il fut grandement troublé. Et pour tant, bassement manda gens de toutes pars, et assambla et fist assambler navire pour icelle poursiévir en Hollande, et meismement y ala en personne. Et luy venu oudict pays, fut receu de plusieurs bonnes villes dudict pays, Herlem, Durdrech, Rottredam (1) et aucunes autres. Et adonc commença la guerre entre ledict duc de Bourgongne d'une part, et la duchesse Jaqueline de Bavière, sa cousine germaine.

           

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)

Notes :
1 Harlem, Dordrecht et Rotterdam.