Chronique d'Enguerrand de Monstrelet - index L.II-47 - [Comment Messire Jehan de Luxembourg asséga Beaumont-en-Argonne]

u commencement de cest an, fu le siège mis tout à l'environ de Beaumont en Argonne par messire Jehan de Luxembourg, accompaigné de plusieurs nobles hommes des marches de Picardie. Auquel siège mettre y eut plusieurs escarmuches entre lesdiz asségans et les asségiés. Es quelles , entre les autres, fut prins et mené dedens la ville ung nommé Enguerant de Gribauval, viguereux et subtil homme d'armes. Pour la prinse duquel ledit de Luxembourg fut moult fort troublé, doubtant que le dessusdit ne fust navré ou mort. Car par grand malice Guillaume de Flavy fist mettre ung linsel en terre, veullant par ce donner à entendre que ce fust ledit Enguerand qui estoit trespassé. Et lui fist faire ung service solempnel tendant, comme on povoit supposer, iceluy fourtraire secrètement hors de la ville et mener en lieu secret et seur, pour ce qu'il sçavoit ledit prisonnier estre riche homme pour payer bonne finance. Toutefois, non obstant que yceulx asségez se meissent très vigeureusement à deffence, si furent-ilz en brief de toutes pars environnés et tellement approchiés que bonnement ne povoient saillir hors de leurdicte ville, si non en grand péril de leur vie. Et pour tant, le dessusdit Guillaume de Flavi, voiant que au long aler le convendroit estre mis en subjection, non espérant avoir souscours, fist traictié avec ledit messire Jehan de Luxembourg environ l'issue du mois de may, par sy que lui et les siens s'en yroient sauvement en emportant tous leurs biens. Et par ainsy ledit messire Jehan de Luxembourg eut l'obéyssance dudit Beaumont, dedens la quelle il mist garnison de ses gens et y constitua capitaine Waleran de Bournonville, et avec ce lui fut rendu sain et sauf en vie ledit Enguerand de Gribouval.
  Durant lequel siège furent trêves données, tant d'un costé comme d'autre, entre messire Jehan de Luxembourg et ceulx de la ville de Mouson , jusques au jour de le Saint Remy ensuivant , en dedens duquel jour dessusdit ceulx de ladicte ville devoient aler vers le roy Charles sçavoir se de luy auroient souscours, ou se ils se renderoient audit messire Jehan de Luxembourg. Après lesquelz traictiez ainsy achevez, ledit messire Jehan congia ses gens, et s'en retourna en son chastel de Beau Revoir. Et Guillaume de Flavi pareillement donna congié à ceulx qui l'avoient servy, et s'en ala à privée mesnie, soubz bon sauf conduit, à Liencourt en Santers, en l'ostel de monseigneur son père. Car, en tant qu'il estoit asségié en Beaumont, le duc de Bar fist démolir et abatre uue forteresse nommée Noefville sur Meuse, laquelle tenoient les gens dudit Guillaume de Flavi, et là avoit sa chevance et sa retraite.

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)