Chronique d'Enguerrand de Monstrelet - index L.II-48 - [Comment le traictié se fist entre le Duc de Bourgongne et la Duchesse Jacqueline de Bavière ; et le contenu en iceluy]

tem, après ce que le duc de Bourgongne fust retourné, comme dit est dessus, ou pays de Hollande, et qu'il eust faites grandes préparacions tant de gens comme d'abillemens de guerre , pour combatre et subjuguer la ville de La Gande (1), où estoit la duchesse Jaqueline et ses aydans, ladicte duchesse et ceulx de son pays, considérans la puissance d'ycelui duc de Bourgongne, et que desjà la plus grand partie des nobles et des communaultez de ses pays s'estoient tournés contre elle avec sa partie adverse, doubtant non pouvoir résister audit duc, prist conseil avec ses plus privés et féaulx serviteurs, et se conclud de traicter de paix avec son beau cousin et adversaire, le duc Phelippe de Bourgongne. Lequel traictié, par le moyen d'aucuns ambassadeurs envoyez entre les deux parties, fut tel qu'il s'ensuit :

  « Est assavoir que ladicte duchesse cosgnoistra et tenra son beau cousin le duc de Bourgongne estre son droit hoir et héritier de tous ses pays. Et dès lors le fist gouverneur et maimbour den dessusdiz pays, prometant ycelle mettre en ses mains toutes les villes et forteresces qu'elle tenoit, dedens lesquelles ycelui duc mettroit telx capitaines qu'il lui plairoit. Promist aussy ycelle dame de non ly jamais marier sans le consentement dudit duc. Et avec ce demouroit à ycelui duc la ville et forteresse de Zenenberghe. »

  Et par ainsy, ledit traictié de paix conclud et finé entre les deux parties, convindrent ensamble certaines journées ensuivans en la ville de Delf. Ouquel lieu, après qu'ilz eurent conjoy l'un à l'autre révéramment, prinrent d'un commun assentement, eulx deux ensamble ou leurs commis, les seremens de plusieurs bonnes villes. Et par ainsy ledit pays de Hollande, qui par longue espace avoit esté travaillé d'icelle guerre, demoura en paix. Et retourna le dessusdit duc de Bourgongne, donnant congié à ses Picars, en son pays de Flandres et d'Artois.

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)

Notes :
1 Gand