Chronique d'Enguerrand de Monstrelet - index L.II-51 - Comment le conte de Salsebery conquist Jargeau et plusieurs aultres villes devers Orliens. Et comment le duc de Bethfort volt avoir les rentes des églises.

tem, le conte de Salsebery, alant comme dit est devant Jargeau, à tout sa puissance, le fist de toutes pars environner et très fort conbatre et approcher de ses gens et habillemens de guerre. Et pour tant, ceulx qui dedens estoient de par le roy Charles, doublans la puissance d'ycelui conte, firent avec luy traictié en luy rendant la place, par si qu'ils s'en pourraient sauvement partir. Lequel conte, après qu'il eust ycelle garnie de ses gens, s'en ala devant Yenville (1) et le fist asségier de toutes pars très puissamment, et les François estans dedens à toute leur puissance, commencèrent à eulx deffendre. Mais en aucuns peu de jours après, trouvèrent manière d'avoir parlement avec ycelui conte, lequel ne se peut à eulx concorder. Et pour ce, après que les François se furent retrais dedens leur ville, s'esmut une escarmouche entre les asségans et les asségiés, pour laquelle la plus grant partie des Anglois s'armèrent tout soudainement, et sans le commandement dudit conte, leur souverain, alèrent en grand hardiesse assaillir la ville, et tant continuèrent en ycelui assault, que assez brief ensuivant ilz prinrent et conquirent ladicte ville, dedens laquelle plusieurs François furent mors et prins. Et y furent fais d'autres maulx inestimables et innumérables, lesquelz seroient trop longz à déclarer.

    

  Item, durant le temps dessusdit, le duc de Bethfort, régent, et ceulx du conseil du roy Henry estant à Paris, requirent très instamment à avoir pour le prouffit dudit roy tous les rentes et héritaiges qui au royaume de France avoient esté données depuis quarante ans par avant aux églises. Et pour ce mettre à exécucion, furent en ladicte cité de Paris tenus plusieurs parlemens et grans consaulx entre ledit duc de Bethfort et le conseil du roy d'une part, et ceulx de l'université de l'Eglise d'autre part. Toute fois ycelle requeste fut très fort débatue, et tant qu'en fin la besongne fut mise à nient, et demourèrent ceulx de l'église paisibles, quand ad ce.

  Ouquel temps aussy, le roy de Portingal (2) mist sus une grosse armée, et avec luy le duc de Cambre (3) qui fesoit son avant garde. Et povoit avoir sur tout dix mille combatans, à tout lesquelz il ala en ung isle sur les mescréans, où estoit le roy d'Albastra, à tout bien vint mille Sarrasins, Turquois, Tartres et Barbarins. Desquelz la plus grand partie furent mors sur la place, et le dessusdit roy d'Albastra fut détenu prisonnier. Après laquelle victoire, le dessusdit roy de Portingal, à peu de perte, retourna en son pays.

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)

Notes :
1 Janville (Eure-et-Loire)

2 Jean I dit le Grand.

3 Le duc de Coïmbre.