Chronique d'Enguerrand de Monstrelet - index L.II-80 - Comment le seigneur de Crevecuer et Robert de Saveuse furent rencon-trés des François en alant à Clermont en Beauvoisis.

u mois de février l'an dessusdit, le seigneur de Crevecuer, capitaine et gouverneur de Clermont en Beauvoisis, se parti d'Amiens pour aller audit lieu de Clermont, accompaignié de Robert de Saveuse et de huit vingts combatans ou environ, avec aulcuns chars et charrettes, menans vivres de quaresme et aultres leurs besongnes. Lesquelz, en passant emprès Saint-Just vers Saint-Remy en Laire (1), furent agaités des François, qui bien sçavoient leur venue, et incontinent envays. Desquelz François estoient capitaines Théolde de Waleperghe, messire Renauld de Fontaines, messire Loys de Waucourt et aulcuns aultres, qui bien avoient plus grand nombre de gens que leur adverse partie. Nientmains, les dessusdiz seigneurs de Crevecuer et de Saveuse se mirent à pied avec leurs gens, dont la plus grand partie estoient archiers, et se deffendirent bien et radement, par l'espace de quatre heures ou environ. Durant lequel temps y eut, tant d'une partie comme d'aultre, pluiseurs hommes et chevaulx bléciés. Mais en conclusion yceulx François se départirent, véans que sans grand perte des leurs ne povoient riens faire, ne conquerre sur leurs ennemis. Si retournèrent en leurs garnisons. Et lesdiz seigneur de Crievecuer et Robert de Saveuse s'en alèrent à Clermont, où ilz furent jusques à la saison nouvelle, attendans la venue du duc de Bour-gongne.
  

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)

Notes :
1 Saint-Rémy-en-l'Eau (Oise).