Chronique d'Enguerrand de Monstrelet - index L.II-85 - Comment Renier, duc de Bar, mist le siège devant Chappes emprès Troyes en Champaigne.

n ce temps, le duc de Bar, nommé Renier de Sezille (1), convoqua de ses duchez de Bar et de Lorraine et des marches d'Alemaigne à l'environ très grand nombre de gens d'armes, avec lesquelz aussi se mist ce prudent et vaillant chevalier le seigneur de Bar-bazan, lequel, comme dit est dessus, avoit esté très long temps prisonnier aux Anglois. Et povoit avoir, ycelui duc, de deux à trois cens combatans, à tout lesquelz il ala asségier Chappes, à trois lieues de Troyes. Dedens laquelle estoit le seigneur d'Auvione, son frère, et avec eulx pluiseurs gens de guerre, qui très vaillamment se mirent à deffence. Et avec ce envoyèrent devers les seigneurs de Bourgongne eux prier qu'ilz les voulsissent secourre à ce besoing. Lesquelz seigneurs, est assavoir, messire Anthoine de Thoulongon, mareschal de Bourgongne, le conte de Joigny, messire Anthoine et messire Jehan de Vergy, le seigneur de Jonvelle, le seigneur de Castellus, le Veau de Bar, et généralment la greigneur partie de la gentilesce de Bourgongne, jusques au nombre de quatre mille combatans, assamblèrent, et vindrent assez près du logis du duc de Bar, pour le combatre. Lequel duc, sachant leur venue, se mist en bonne ordonnance de bataille. Mais en brief, yceulx Bourguignons se mirent en desroy et retournèrent en leur pays. Si en furent, que mors que pris, environ soixante. Entre lesquelz fut prins le seigneur de Plansy, Charles de Rochefort, et pareillement le seigneur d'Aumont, en saillant hors de sa place pour aydier à combatre ses ennemis avec aulcuns de ses gens, fut prins prisonnier. Si convint qu'il livrast sa forteresce au duc de Bar, laquelle fut du tout démolie. Et son frère fut prins comme lui.

                                      

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)

Notes :
1 René d'Anjou, roi de Sicile.