Chronique de la Pucelle - index 13 - Mutations de conseillers

' an mil quatre cent vingt cinq (1) le Roy envoya vers le duc de Bretagne Messire Tanneguy de Chastel, qui estoit natif du pays de Bretagne, et lequel on disoit estre luy et ses parens bien aymez du Duc ; et luy fit prier et requérir qu'il le voulust ayder et secourir, en luy remonstrant, qu'il y estoit tenu en plusieurs et diverses manières. Le Duc respondit pleinement qu'il n'y entendroit en rien, sinon que, préalablement et avant tout œuvre, le roy mit hors de sa compagnée et de son hostel tous ceux qui estoient consentans de sa prise, et les nomma. Le roy envoya pareillement vers le Duc de Savoye, pour sçavoir si le duc de Bourgongne ne voudroit point entendre à quelque traité ; ct aussi si ledit duc ne voudroit point ayder au roy : lequel respondit qu'il scavoit bien que le duc de Bourgongne n'entendroit à aucun traité, sinon que préalablement le roy mit hors d'avec luy ceux qui avoient esté consentans de la mort du feu duc de Bourgongne son père ; et ce fait, aussi que le duc de Savoye ayderoit volontiers au roy de ce qu'il pourroit.
  Et estoit aucune renommée que le duc de Bourgongne se lassoit fort d'estre allié avec les Anglois ; et aucuns estans près de luy l'induisoient fort de s'en démettre et que ce qu'il avoit fait, fut bien soudainement et par une chaleur causée de desplaisance de la mort de son père ainsi mort. Ceux qui furent envoyez devers lesdits seigneurs retournèrent devers le roy et luy exposèrent la responce qui leur avoit esté faicte par lesdits seigneurs. Mesmes ledit Tanneguy qui estoit présent et lequel relata ce que le duc de Bretagne luy avoit respondu, dit ; Que combien qu'il ne fust consentant ny de la mort du duc de Bourgongne, ny de la prise du duc de Bretagne ; toutesfois, pour ce qu'au temps des choses advenues il estoit près du roy ; il estoit content de s'en partir. Et de faict s'en alla en Languedoc, en une place nommée Beaucaire. Et au regard du président de Provence (2) il luy faisoit mal d'en partir, et dit qu'il ne s'en iroit point ; toutesfois il s'en partit et alla à la fin : et aussi fit le physicien, nommé Maistre Jehan Cadart, lcquel on tenoit le plus sage et mieux advisé ; car il s'en alla riche de vingt cinq à trente mille escus. Et ledit président mit en son lieu le seigneur de Giac, lequel estoit des plus prochains du roy.

                                                 

Source : édition Vallet de Viriville - éd.1859

Notes :
1 Pâques le 18 avril.

2 Jean Louvet.