Chronique de la Pucelle - index 29 - Tournay recouvré par la France - Jacques de Harcourt tué devant le château de Parthenay.

a ville et cité de Tournay, qui estoit comme entre les mains du due de Bourgongne, obéit tout pleinement et se tint nuement au roy.
  Messire Jacques de Harcourt tenoit le Crotoy, et avoit des gens de guerre avec luy ; les Anglois y mirent le siège et la prirent par composition. Ledit de Harcourt, qui estoit neveu du seigneur de Parthenay s'en vinct en Poictou, et se disoit avoir droit à ladicte place de Partenay. Nonobstant ala il voir son oncle, seigneur de ladite place, lequel luy fit grant chère, et le receut honnorablement. Ledit de Harcourt regarda fort ladicte place, qui sembloit belle et forte et convoita fort a l'avoir, s'imaginant et considérant que son oncle n'estoit pas bien sage comme l'on disoit. Puis s'en retourna, pensant qu il retournerait une autre fois, et qu'il auroit la place, s'il pouvoit ; car si luy et ses gens pouvoient entrer au chastel ils seroient les plus forts ; ce qui lui sembloit bien facile a exécuter, veu qu'audit chastel il y avoit une yssue qui sailloit aux champs, laquelle il ouvriroit à force et mettroit gens par là, puis feroit lever le pont levis du faire. Après disner, il vint au seigneur de Parthenay son uncle et lui dit plainement qu'il avoit sa part audit chastel, et qu'il falloit qu'il le gardast à son tour ; et que s'il y avoit homme qui l'en voulust empescher, qu'il le tueroit ou feroit mourir ; et dit-on que lui et ses gens tirèrent leurs espées. Le seigneur et ses gens furent bien esbahis, desquels aucuns se retirèrent en la tour du pont levis de devers la ville, lequel estoit levé. Si tinrent ladite tour, et commencèrent d'en haut à crier l'allarme. Pourquoy le peuple de la ville s'esmeut tout à coup et apportèrent eschelles, si gaingnèrent et abbatirent le pont-levis et entrèrent dedans la place à l'ayde de ceux de dedans la tour, puis tuèrent tous les gens dudit de Harcourt, lequel se retira en une tour en bas, où il yavoit de petites arbalestes, et fenestres qui estoient bien estroites ; toutesfois on luy perça les deux cuisses d'une lance par une des lucarnes. Et pour abréger il fut tué, et ses gens furent jettez tous morts en la rivière, et il fut enterré en un cimetière.

                                                 

Source : édition Vallet de Viriville - éd.1859