Chronique de la Pucelle - index 36 - De l'assaut du boulevart d'Orléans

e jeudy vingt et unième jour d'octobre mille quatre cent vingt huict, Anglois livrèrent à toute puissance environ heure de midy, un fier et merveilleux assault contre les François qui tenoient le boulevart du bout du pont d'Orléans. L'assault dura longuement, auquel furent tuez et navrez plusieurs Anglois, car François les abbatoient des eschelles dedans les fossez, dont ils ne se pouvoient relever, aftendu qu'on jettoit sur eux cercles liez et croisez, cendres vives, chaux, presses fondues et eaues chaudes que les femmes d'Orléans apportoient. Et pour rafraischir les François du grand travail qu'ils souffroient, lesdites femmes leur bailloient vin, viandes, fruicts, vinaigres et tousilles blanches ; et aussi leur portoient pierres et tout ce qui pouvoit servir à la défense ; dont aucunes furent veues durant l'assault qui repoussoient de lances les Anglois, des entrées du boulevart et les abbatoient ès fossez.
  Anglois furent la grevez a merveilles, et tant qu'ils cessèrent l'assault, où moult perdirent. En iceluy assault fut blessé Pierre de la Chapelle dont il mourut le second jour et fut moult plaint. Aussi y furent blessez les seigneurs de Guitry, de Couraze, de Villars, Nicole de Giresme et Poton de Sainte-Traille, lesquels furent du depuis guéris. Après lequel assault, Anglois, qui n'avoient pas faict la mine encommencer, y besognèrent tant jour et nuict que ledit boulevart fut presque tout miné et n'estoit retenu que sur estayes (1), où il ne failloit fors mettre le feu pour faire fondre iceluy boulevart et accabler ceux qui estoient dedans. Mais le samedy ensuivant vingt et troisiesme jour dudit mois d'octobre ceux d'Orléans, qui de ce eurent cognoissance, mirent le feu audit boulevart, a la veue des Anglois, et se retirèrent ès Tournelles du pont, dont ils levèrent le pont. Et se doutant toujours qu'ils ne peussent longuement tenir les Tournelles dont partie estoit fort batue et empirée, ils rompirent aucunes arches du pont, outre lesquelles ils levèrent un boulevart du costé par devers la ville et fortifièrent ledit pont.

                         

                                                 

Source : édition Vallet de Viriville

Illustration :
- Orléans, notre-Dame de recouvrance ("La grande histoire illustrée de Jeanne d'Arc" - H.Debout - 4°ed.1922).

Notes :
1 Estayes : étais