La geste des nobles - index De la Pucelle venue par devers le roy et des merveilles d'elle

es choses durans, fut admenée à Chinon devers le roy de France, une fille de simple estat, pucelle de sainte et religieuse vie, du pays de Barrois, qui fille fut d'un povre laboureur de la contrée et de sa femme, qui de leur loyal labour vivoient, aagée d'environ vint ans. Et ou temps de son enffance avoit esté pastoure et peu savoit des choses mondaines et peu parla. Ceste pucelle seulement parloit de Dieu et de sa benoiste Mère, des anges, des sains et saintes de paradis et disoit que par plusieurs fois lui avoit esté dictes aucunes révélacions touchans la salvacion du roy et préservacion de toute sa seigneurie ; laquelle Dieu ne voulloit lui estre tollue ne usurpée mais déboutez en seroient ses ennemis. Et ces choses estoit chargée de dire et signiffier au roy dedens le terme de S. Jehan m cccc xxix. Si fut la pucelle ouye par le roy en son conseil et là ouvri les choses à elle chargées et à merveilles traicta des manières de faire vuider Anglois du royaume et la ne fut chief de guerre qui tant proprement sceust remonstrer les manières de guerroier ses ennemis, dont le roy et son conseil fut esmerveillé, car en toutes autres matières fut autant simple comme une pastoure. Pour ceste merveille, alla le roy à Poitiers et la mena la Pucelle qui par les notables du parlement et par docteurs solempnez en théologie, la fist interroguer et elle ouye affermèrent que ilz la réputoient chose divine inspirée de Dieu ; et tout son fait et toutes ses parolles approuvèrent. Dont en plus grant révérence la tint le roy, qui à ce temps mandoit gens de toutes pars et grant quantité de vivres et artillerie avoit fait mener à Blois, pour la cité d'Orléans secourir. Si requist la Pucelle, que pour le secours conduire, pleust au roy lui bailler telle gent et en tel nombre que elle requerroit, qui ne seroit pas grant nombre ne grant puissance et que pour son corps lui feust admenistré ung hernois entier. (1)

                                                 

Source : édition Vallet de Viriville

Notes :
1 La suite sur la chronique de la Pucelle à partir de : "alors le roi ordonna..."