La geste des nobles - index fin chap.260

... Et de Gien se parti le roy le jour de S. Pierre au mois de juing m cccc xxix à toute sa puissance et tenant sa voie droit à Rains, le roy s'adreça en Aucerrois, et par ses héraulx manda aux bourgois de la cité d'Aucerre, à ceulx de Cravant et de Coulanges les Vineuses, qui pour le roy anglois et le duc de Bourgoingne se tenoient, que en son obéissance se rendissent ; auquel mandement ilz obéirent, et en sa grâce les receupt et aultres villes et chasteaulx de la contrée, et bénignement leur pardonna toutes offenses. Si administrèrent au roy vivres et charroy abondamment pour son host soutenir ; et, tout ce que requérir leur voult, s'emploièrent en son service. Dedans Aucerre n'entra pas le roy à celle foiz ; mais pour la possession en prendre et le sèrement en recevoir du clergié et des bourgois, y envoya de haulx seigneurs, et ce fait passa la rivière d'Yonne et de toutes parts ala chacun jour son host croissant, tant de haulx seigneurs, barons et nobles, comme bourgois et gens de commun. En chevauchant païs et recevant villes et places en obéissance, tint son chemin droit à la cité de Troies en Champaigne, dedans laquelle le duc de Bourgoigne avoit establi plusieurs cappitaines au nombre de cinq cents hommes d'armes pour résister contre le roy.

                                                 

Source : édition Vallet de Viriville