 |
Journal
du siège d'Orléans
-
index
3
mars 1429 |
 |
e jeudy, troisiesme jour de mars, saillirent les Françoys
au matin contre les Angloys, faisans pour lors ung foussé
pour aler au couvert de leur bolevart de la Croix Boissée
à Saint Ladre d'Orléans, afin que les François
ne les peussent veoir ne grever de canons et bombardes. Celle saillie
feist grant domaige aux Angloys, car neuf d'eux furent prins prisonniers.
Et Oultre ce, y tua maistre Jehan d'une couleuvrine cincq personnes,
à deux coups. Et desquelz cincq fut le seigneur de Gres,
nepveu du conte de Salebris, qui estoit cappitaine d'Yenville ;
dont les Anglois feirent grans regretz, parce qu'il estoit
de grant hardiesse et vaillance.
Cellui mesmes jour, eut aussy une très forte
et grande escarmousche, car les Françoys saillirent d'Orléans,
et alèrent jusques bien prez du boulevart des Angloys
estans à la Croix Boissée, et gaignèrent ung
canon gectant pierres grousses comme une boule. Et oultre ce en
rapportèrent dedans leur ville deux tasses d'argent, une
robe fourrée de martres, et plusieurs haches, guisarmes,
arc, trousses de fleiches, et autres habillemens de guerre. Mais
incontinant aprez, saillirent les Angloys de leur ost et bastilles,
portant neuf estandars qu'ilz desployèrent, et chassèrent
les Françoys jusques bien près du boulevart de la
porte Banier, et ce faict se retirèrent, combien que de rechef
et toust retournèrent et chargèrent fort et asprement
sur les Françoys, et tant les suivirent de prez, que plusieurs
d'entre eulx se gectèrent dedans les foussez d'icelle porte
; contre lesquelz gectèrent ceulx d'Orléans à
grant force. Et entre les autres qui là cheurent, furent
ung Estienne Fauveau, d'Orléans mesmes. Et ce faisoient,
parce qu'ilz ne povoient pas fouyr. En celle escarmousche tuèrent,
blecèrent et prindrent les Angloys plusieurs prisonniers,
et par especial y prindrent un vaillant escuier gascon, nommé
Regnault Guillaume de Vernade, qui estoit fort blécié.
Source
: édition MM. Paul Charpentier et Charles Cuissard - 1896
|
