Journal du siège d'Orléans - index Septembre 1429

  Et oultre celle ordonnance, voult et commanda que le conte de Vendosme et l'admiral de Culant se tinssent à Sainct Denis, ausquelz il bailla aussi plusieurs gens d'armes, afin qu'ilz poussent tenir la garnison. Et ce faict, se partist le douziesme jour de septembre, et s'en ala à Laigny sur Marne, dont il se partit le lendemain, et y ordonna cappitaine messire Ambroys de Loré, auquel il bailla messire Jehan Foucault, avecques plusieurs gens de guerre. Et tira d'illec le lendemain à Provins, et de là à Bray sur Seine, que les habitans réduirent à son obéissance. Et puis, s'en ala passer pardevant Sens, qui ne luy feist aucune ouverture ; mais luy convint passer à gué, ung peu au dessoubz, la rivière d'Yonne, et tirer à Courtenay, dont il ala à Chasteau Regnart et à Montargis, et au derrain à Gien, où il actendit aucuns jours, cuidant avoir accord avec le duc de Bourgoigne, qui luy avoit mandé par le seigneur de Chargny qu'il luy feroit avoir Paris, et qu'il y vendroit en personne. Et à celle occasion, luy avoit le roy envoyé sauf conduit, affin qu'il peust passer sans contredit par les places et passaiges à luy obéissans ; et ainsi fist il, combien que luy arrivé à Paris, il ne tint riens de ce que il avoit promis; ainçoys fist alliance avecques le duc de Bethefort allencontre du roy, de trop plus fort que devant; et ce non obstant, par vertu du sauf conduit, passa sceurement et franchement par tous les pays, villes et passaiges de l'obéyssance du roy, et s'en retourna en ses pays de Picardye et de Flandres. Et le roy, qui fut adverty au vray, passa la rivière de Loire et s'en retourna à Bourges dont il estoit party à la requeste et supplication de la Pucelle, laquelle luy avoit dit par avant tout ce qu'il luy advint du lièvement du siége d'Orléans, et de son sainct sacre, et aussi de son retour franchement, ainsi que luy avoit révellé Nostre Seigneur.

  En remercyant lequel et louant de sa grace, fays fin par son octroy divin à cestuy présent et très compendieux traictié, préintitulé du siége d'Orléans, mis par les Angloys et de la venue et vaillans faiz de Jehanne la Pucelle, et comment elle les en feist partir, et feist sacrer à Reins le roy Charles septiesme, par grace divine et force d'armes.
                                 Explicit hic liber, qui scripsit vivat in evum.

                                                 

Source : édition MM. Paul Charpentier et Charles Cuissard - 1896
Mise en Français plus moderne : J.B.J. Ayroles (La vraie Jeanne d'Arc - t.III)

Notes :
1 Charles de Poitiers II, seigneur de Clevieu et de Chalençon.

2 Bombe à feu, moin puissante et plus longue que la bombarde et se chargeant par la culasse.