 |
Lettre
du Duc de Bourgogne aux habitants de Saint-Quentin leur annonçant la prise de la Pucelle
23 mai 1430
|
 |
 ettre écrite par le Duc de Bourgogne le soir même de la capture de Jeanne d'Arc aux habitants de Saint-Quentin, pour leur annoncer la "bonne nouvelle".
Cette lettre est tirée des archives de l'Hôtel de Ville de Saint-Quentin.
*
* *
De par le duc de Bourgongne, conte de Flandres, d'Artois, de Bourgogne et de Namur, très chiers et bien amez, sachans que vous désirez savoir de noz nouvelles, vous signifions que ce jour d'uy XXIIIe de May, environ six heures après midi, les adversaires de Monseigneur le Roy (1) et les nostres, qui s'estoient mis ensemble en très grosse puissance et boutez en la ville de Compiengne, devant la quelle nous et les gens de nostre armée sommes logiez, sont sailliz de la dicte ville à puissance sur le logis de nostre avangarde le plus prouchain d'eulx ; à laquelle saillie estoit celle qu'ilz appellent la Pucelle, avecques plusieurs de leurs principaulx capitaines. A l'encontre desquels, beau cousin, messire Jehan de Lucembourg qui y estoit présent, et autres nos gens et aucuns des gens de Monseigneur le Roy qu'il avoit envoié par devers nous pour passer oultre et aler à Paris, ont fait très grant et aspre résistence ; et prestement en nostre personne y arrivasmes, et trouvasmes que les diz adversaires estoient jà reboutez ; et par le plaisir de nostre benoist créateur, la chose est ainsi avenue et nous a fait tele grâce que Icelle appellée la Pucelle a esté prise, et avecques elle plusieurs capitaines, chevaliers, escuyers et autres prins, noiez et mors, dont à ceste heure nous ne savons encores les noms, sans ce que aucuns de noz gens ne des gens de mon dit seigneur le Roy y aient esté mors ou prins, ne qu'il y ait eu de nos gens bleciez vint personnes, la grâce Dieu. De la quelle prise ainsi que tenons certainement, seront grans nouvelles partout, et sera congneue l'erreur et fole créance de tous ceulz qui ès faiz d'Icelle femme se sont rendus enclins et favorables ; et ceste chose vous écrivons pour, noz nouvelles, esperans que en aurez joye, confort et consolation et en rendrez graces et louenges à nostre dit Créateur qui tout voit et cognoist, et qui, par son benoist plaisir, vueille conduire le surplus de noz emprises au bien de nostre dit seigneur le Roy et de sa seigneurie et au relièvement et reconfort de ses bons et loyaulx subgez. Très chiers et bien amez, le
« Saint-Esperit vous ait en sa sainte garde.
Escript à Côdun emprês Compiengne le XXIIIe jour de May.
Signé: MILET
Au dos est écrit: « A nos très chiers et bien amez les gens
d'Eglise, bourgois et habitans de Saint-Quentin en Vermandois. »
Source : Ch. Gomart "Jeanne d'Arc au château de Beaurevoir" - Mémoires de la société d'émulation de Cambrai - Tome XXVIII (2ème partie) - 1865.
Se trouve aussi à Quicherat - t.V p.166.
Notes :
1 Henri VI d'Angleterre.
|
