 |
XXV. Martii. [Rogat Johanna sibi liceat missam audire.]
p. 191 à 193 |
 |
 tem dominica in Ramis Palmarum, immediate sequenti,
die XXV. dicti mensis martii de mane, in loco
carceris dictæ Johannæ, in castro Rothomagensi, nos,
episcopus prædictus, allocuti fuimus prædictam Johannam,
præsentibus venerabilibus viris, dominis et
magistris : Johanne Pulchripatris, Nicolao Midi, Petro
Mauricii, doctoribus ; et Thoma de Courcellis bachalario
in sacra theologia. Et eidem Johannæ diximus
quod pluries, et maxime die hesterno, ipsa requisiverat
quod, propter dierum et temporis solemnitatem, ipsa permitteretur audire missam in ipsa dominica
quæ erat in Ramis Palmarum : propterea nos ab ea
quærebamus utrum, si istud eidem concederemus,
vellet dimittere habitum virilem et recipere habitum
muliebrem, prout consueverat in loco nativitatis suæ,
et prout mulieres sui loci consueverunt deferre.
Ad quod dicta Johanna respondit requirendo quod
permitteretur audire missam in habitu virili in quo
erat, et quod etiam posset percipere sacramentum
Eucharistiæ in festo Paschæ.
Tunc eidem diximus quod ad petitum responderet,
videlicet an vellet dimittere habitum virilem, si hoc
sibi concederetur. Ipsa vero respondit quod de hoc
non erat consulta, nec poterat adhuc recipere dictum
habitum.
Et nos ei diximus an vellet habere consilium cum
Sanctis, utrum reciperet habitum muliebrem. Ad quod
respondit quod permitti poterat in hoc statu missam
audire, quod summe optabat ; sed habitum mutare non
poterat, nec etiam hoc erat in ipsa.
Postmodum, dicti magistri exhortati sunt eam quod,
pro tanto bono et devotione quem videbatur gerere,
quod vellet capere habitum suo sexui congruentem.
Quæ Johanna iterum respondit quod in ipsa non erat
hoc facere ; et, si in ipsa esset, hoc esset bene cito
factum.
Fuit autem sibi dictum quod loqueretur cum
vocibus suis ad sciendum si resumeret habitum muliebrem,
ut in Pascha posset percipere viaticum. Ad quod respondit dicta Johanna quod, quantum est de
ipsa, non perciperet ipsum viaticum, mutando habitum
suum in muliebrem ; rogabatque quod permitteretur audire missam in habitu virili, dicens quod ille
habitus non onerabat animam suam, et quod ipsum
portare non erat contra Ecclesiam.
De quibus omnibus, dictus dominas Johannes de
Estiveto, promotor, petiit instrumentum, præsentibus
dominis et magistris : Adam Milet, regis secretario
; Guillelmo Brolbster et Petro Orient, Rothomagensis,
Londoniensis et Catalaunensis dioecesium.
Source : Edition Jules Renouard et Cie - 1841
Nota : publication sans aucune garantie d'exactitude parfaite avec le texte original.
|
