 |
Jeanne
d'Arc par Henri Wallon - 5° éd. 1879
Appendice II-14 : Lettre de garantie donnée aux juges |
 |
« Henry, par la grâce de Dieu, roy de France et d'Angleterre,
etc...
« Comme depuis aucun temps en ça nous aions esté requis
et exhortez par nostre très chière et très amée fille l'Université
de Paris que une femme, qui se faisoit appeller
Jehanne la Pucelle, laquelle avoit esté prinse en armes par aucuns de nos subjectz ou diocèse de Beauvaiz, dedans les
mectes de la jurisdiction espirituelle dudit diocèse, que
icelle femme feust rendue, baillée et délivrée à l'Église,
comme véhémentement suspictionnée, reconnue et notoirement
diffamée d'avoir semé, dit et publié en plusieurs et divers lieux et contrées de nostredit royaulme de France
plusieurs grans erreurs, exercé, commis et perpétré crimes,
excetz et délitz moult énormes à l'encontre de nostre
saincte foy catholique, et ou grand esclandre de tout le
peuple chrestien; aions esté aussi requis et sommez très
instamment, et par plusieurs et diverses foiz, par nostre
amé et féal conseiller l'évesque de Beauvaiz, juge ordinaire
d'icelle femme, que icelle lui vousissions rendre et bailler et délivrer, pour estre par lui, comme son juge,
corrigée et purgée (pugnie)....,  lequel nostredit conseiller,
joint avecques lui le vicaire de l'inquisiteur de la foy,
icelluy inquisiteur absent, ayant ensemble fait leur inquisicion
et procès sur iceulx erreurs, crimes, excetz et délicts, et tellement que par leur sentence diffinitive finablement
icelle femme, comme rencheu èsditz erreurs, crimes,
excetz et délictz, après certaine abjuracion par elle publiquement
faicte, aient déclairée relapse et hérétique, mise
hors de leurs mains, et délaissée à nostre court et justice
séculière, comme toutes ces choses peuent plus à plain
apparoir par ledit procès; par laquelle nostre court et
justice séculière ladicte femme ait esté condempnée à estre
brûlée et arse, et ainsy exécutée. Pource que par adventure
aucuns qui pourroient avoir eu les erreurs et malefices de ladicte Jehanne agréables, et autres qui indeuement
s'efforceroient.... troubler les vrays jugements de nostre
mère saincte Église, de traire en cause pardevant nostre
saint père le Pape, le saint concile général ou autre part,
lesdits révérend père en Dieu, vicaire, les docteurs, maistres,
etc..., qui se sont entremis dudit procès : Nous....
affin que d'ores en avant tous aultres juges et docteurs,
maîtres et autres.... soient plus ententifs.... de vacquier
et entendre sans peur ou contraincte aux extirpacions des erreurs.... PROMECTONS en parolle de roy que, s'il advient
que lesdits juges, etc., feussent traiz en cause à l'occasion
dudit procès pardevant nostre dit saint père le Pape, ledit
saint concille général, etc., nous aiderons et deffendrons
tous lesdits juges, docteurs, maistres, etc.... à nos propres coustz et despenz et à leur cause en ceste partie, nous....
adjoindrons au procès que en vouldront intenter contre
eulx quelconques personnes.... » Et il donne à cet effet des
ordres à ses ambassadeurs et à tous les évêques, etc..., de
son obéissance (12 juin 1431), t. III, p. 241-243.
Source
: Jeanne d'Arc - Henri Wallon - 5° éd. 1879.
Notes :
/
|
