 |
Chronique
d'Enguerrand de Monstrelet
-
index
L.I-254 - [Comment messire Jaques de Harecourt fut rencontré des Anglois. — Et la taille des marcs d'argent.] |
 |
 nviron ce temps, messire Jaques de Harecourt chevauchant en Vimeu, à tout six ou sept cens combatans, fut rencontré des Anglois, qui d'aventure s'estoient assemblez d'Arques, de Neufchastel et d'autres lieux voisins pour aler quérir leur aventure. Ouquel rencontre y eut cruelle et aspre bataille. Toutesfoiz, en conclusion les Anglois obtindrent la victoire, et y perdit ledit messire Jaques de deux à trois cens de ses hommes, tant prins comme mors. Mais lui, de sa personne se saulva par son cheval, et avecques lui grant partie de chevaliers et escuiers qui là estoient. Entre lesquelz y fut prins, desdiz Daulphinois, le seigneur de Verdui-sant, qui lors estoit pour le Daulphin ung des capitaines de Saint Walery. Et après ceste besongne, les Anglois, joieux de ceste bonne aventure et bonne fortune, retournèrent, à tout leurs prisonniers, en leurs propres lieux.
Item, eu ce temps fut levée et cueillie en plusieurs parties du royaume de France une taille assez rigoureuse de mars d'argent, octroiée et accordée par les Trois Estas du royaume à la requeste des roys de France et d'Angleterre, pour forger bonne monnoie et faire courir oudit royaume, et à la cueillir sur gens d'église, chevaliers et escuiers, dames et damoiselles, bourgois et autres qui avoient puissance. Et fut icelle taille assise par les commis des roys dessusdiz du tout à leur voulenté et discrécion. Et par ainsi prindrent et levèrent tellement quellement, oultre le gré de ceulx à qui ce compétoit, très grans finances. Pour lesquelles lever, lesdiz commis acquirent grans haynes contre plusieurs, et entre les autres en fut fort hay le bailli d'Amiens, de ceulx de son bailliage, pour ce qu'ilz avoient suspicion contre lui que par son moien oeste taille eust esté mise ou pays dessusdit.
Source : La chronique
d'Enguerrand de Monstrelet - Tome IV (L.Douët d'Arcq - 1860)
Notes :
/
|
