Chronique de la Pucelle - index 3 - Tentative sur Fresnay - Hostilités en Picardie et dans le Maine

nviron ce temps, Messire Jean du Bellay et Messire Ambroise de Loré fisrent une assemblée pour cuider aller recouvrer Fresnay et vinrent courir devant. Mais les Anglois ne saillirent aucunement et ils s'en retournèrent repaistre à Sillé-le- Guillaume et de là se partit le dit de Loré pour s'en retourner à Sainte-Suzanne et ledict du Bellay au Mans, qui avoit environ deux cents chevaux. Guillaume Kyriel Anglois estoit pour lors sur les champs accompaigné de quatre vingts Anglois ; lesquels se misrent à pied à l'encontre d'une haye et les François vinrent à cheval frapper vaillamment sur lesdits Anglois qui avoient fort traict : finalement les François furent desconfits et y en eut plusieurs tuez et prins.

  En ce temps, le duc de Bourgongne estoit sur les champs et aussi estoient les François ; ils se rencontrèrent et il y eust bien dure et aspre besongne et plusieurs ruez par terre et navrez d'un costé et d'autre. Le duc de Bourgongne s'y comporta vaillamment, et à la fin les François furent desconfits et y en eut de morts et de prins nonobstant que les Bourguignons y eurent grand dommaige. Le seigneur de Gamaches et Messire Amaury de Sainct-Léger, tenans le party du roy, trouvèrent vers la Blanque-Taque en Picardie plusieurs Bourguignons ; si frappèrent sus et les ennemis se misrent fort en deffense ; mais finalement iceux Bourguignons furent desconfits et y eut plusieurs de tuez et de prins.

  Au pays du Maine environ Neufville-Lalais le sieur de Fontaines et aucuns Anglois se rencontrèrent ; et après ce qu'ils se furent bien entre-batus ; les Anglois furent desconfistz et y en eut environ huict vingts (1) de tuez et de prins. Pour ledit temps, le comte de Boucan Escossois estoit connestable de France.

                                                 

Source : édition Vallet de Viriville

Notes :
1 Huit vingt : 160