Chronique d'Enguerrand de Monstrelet - index L.II-88 - Comment, après la prinse de la Pucelle, le duc de Bourgongne et ses gens se logèrent devant Compiengne.

endemain du jour de l'Assencion (1), le duc de Bourgogne s'en ala loger de la ville de Coudin à Venette dedens l'abbaye (2), et ses gens se logèrent en la ville. D'aultre part, messire Jehan de Luxembourg se loga à Marigni (3). Si fut assez brief ensuivant commencée une bastille de terre, à une traite d'arc ou environ près du bolevert de la ville. Et depuis furent fais aulcuns taudis de quesnes plains de terre et autre bois fichié en terre, au plus près du dessusdit bolevert. Auxquelz taudis se faisoit, nuit et jour, continuelement guet de gens d armes. Avec lesquelz furent fais, depuis ladicte bastille jusques auxdiz taudis, grans fossés par où les gens de guerre aloient seurement à leur dit guet, pour la doubte des engiens de ladicte ville, dont on estoit servi très largement. Si fist ycellui duc asseoir aucuns grans engiens devant la porte, laquelle, par la continuacion des grosses pierres qu'ilz y gectèrent, dérompirent, et cravantèrent en pluiseurs lieux les portes, pons, moulins et bolevers de ladicte ville, et tant qu'en fin y eut aulcune partie des moulins mis en tel point que plus ne porent mouldre. Laquelle chose despleut grandement aux habitans d'ycelle. Et avec ce, oultre les aultres maulx que firent les dessusdiz engiens, occirent ung gentilhomme, rade et babille, eagié de vint deux ans ou environ, nommé Loys de Flavy, lequel estoit frère de Guillaume de Flavy, général capitaine d'ycelle ville de Compiengne et de tous ceulx là estans. Pour la mort duquel, ledit Guillaume fut moult troublé et anoyeux, mais non obstant il n'en moustra nul samblant, ains pour resbaudir ses gens, brief ensuivant fist devant lui sonner ses menestrelx, ainsi qu'il avoit acoustume de faire. Et avec ce fist diligamment garder le bolevert dessusdit, nonobstant que par les diz engiens il fust moult empiré et travaillié. Et avoit fait faire, ou fons des fossés d'ycel bolevert, petites maisoncelles de bois, où ses gens se tenoient pour faire leur guet moult subtillement. Si furent par l'introduction de messire Jehan de Luxembourg commencées aulcunes mines, lesquelles furent chaciés bien avant et parfont et à grant coust, sans porter effet en valeur. Ouquel temps aussi, en faisant lesdictes mines et approches, en y eut pluiseurs des asségans mors et navrés. Desquelz mors furent les principaulx, messire Jehan de Belles, chevalier, Alard d'Escassines, Thiebault de Caitignies et pluiseurs autres, tant de la partie de Bourgongne, comme des Anglois.

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)

Notes :
1 Le 26 mai.

2 L'abbaye de la Victoire.

3 Lis. Margny.