Procès de réhabilitation Déposition de Guillaume Duval en 1450

  Révérend père en Dieu et religieuse personne, frère Guillaume Duval (1), de l'ordre et convent des Frères Prescheurs de Saint-Jacques de Rouen, vénérable docteur en théologie, aagé de quarante cinq ans ou environ, juré et examiné l'an et jour dessusditz,

  Dépose que, quant on faisoit actuellement le procez de ladicte Jehanne ; il se trouva en une session avec Ysambert de La Pierre, et quant ilz ne trouvoient lieu propre à eulx asseoir ou consistoire, ilz s'en alloient asseoir au parmy de la table, auprès de la Pucelle ; et quant on l'interroguoit et examinoit, ledit frère Ysambert l'advertissoit de ce qu'elle devoit dire, en la boutant, ou faisant autre signe. Laquelle session faicte, cellui qui parle et frère Ysambert, avecques maistre Jehan de la Fontaine, furent députés juges pour la visiter et conceiller ledit jour après disner ; lesquelz vindrent ensemble ou chasteau de Rouen, pour la visiter et admonester ; et là trouvèrent le conte de Varvic, lequel assallit par grant despit et indignacion, mordantes injures et opprobres contumelieux ledit frère Ysambert, en lui disant : « Pourquoy souches-tu le matin ceste meschante, en lui faisant tant de signes ? Par la morbieu, vilain, se je m'aperçoys plus que tu mettes peine de la délivrer et advertir de son prouffict, je te ferai gecter en Seine. » Pour quoy les deux compaignons dudit Ysambert s'enfouirent de paour en leur convent.
  Toutes ces choses veit et oyt celui qui parle, et non davantaige, car il ne fut pas présent au procez.

Sources :
- "Procès de Jeanne d'Arc" - Jules Quicherat - tome II.

Notes :
1 Appelé Jean Duval dans les documents du procès de condamnation.