Procès de réhabilitation Déposition de Jean Toutmouillé en 1450

Vénérable et religieuse personne, frère Jehan Toutmouillé, de l'ordre des Frères Prescheurs au convent des Jacobins de Rouen, docteur en théologie, aagé de quarante deux ans, juré et examiné le V° jour de mars ;

  "Et premièrement de l'affeccion des juges et de ceulx qui ont traictié et mené le procez de ladicte Jehanne, dépose, pour ce qu'il n'a point assisté et comparu au procez, qu'il ne sauroit rien dire de vue ; mais rapporte que la commune renommée divulgoit que par apetit de vengeance perverse, ilz l'avoient persécutée, et de ce donné signe et apparence. Car devant la mort d'elle, les Anglois proposèrent mettre le siége devant Louviers, mais tantost muèrent leur propos, disant que point n'assiégeroient ladicte ville, jusques à tant que ladicte Pucelle eust esté examinée : de quoy ce qui ensuit fait probacion évidente ; car incontinent après la combustion d'icelle, sont allés planter le siége devant Louviers, estimant que durant sa vie, jamais n'auroient gloire ne prospérité en fait de guerre.
  Item dit et depose ledit Toutmouillé que, le jour que ladicte Jehanne fut délaissée au jugement séculier et livrée à combustion, se trouva le matin en la prison avec frère Martin Ladvenu, que l'évesque de Beauvais avoit envoyé vers elle, pour lui annoncer la mort prouchaine, et pour l'induire à vraye contricion et pénitence, et aussi pour l'ouyr de confession ; ce que ledit Ladvenu fist moult soigneusement et charitativement. Et quant il annonça à la pouvre femme la mort de quoy elle devoit mourir ce jour là, que ainsi ses juges le avoient ordonné et entendu, et oy la dure et cruelle mort qui lui estoit prouchaine, commença à s'escrier doloreusement et piteusement, se destraire et arracher les cheveulx :
  "Hélas ! me traite-l'en ainsi horriblement et cruellement, qu'il faille [que] mon cors net en entier, qui ne fut jamais corrompu, soit aujourd'hui consumé et rendu en cendres ! Ha ! a ! j'aymeroie mieulx estre descapitée sept fois, que d'estre ainsi bruslée.
  Hélas ! se j'eusse esté en la prison ecclésiastique à laquelle je m'estoie submise, et que j'eusse esté gardée par les gens d'Église, non pas par mes ennemys et adversaires, il ne me fust pas si misérablement mescheu, comme il est. O ! j'en appelle devant Dieu, le grant juge, des grans torts et ingravances qu'on me fait." Et elle se complaignoit merveilleusement en ce lieu, ainsi que dit le déposant, des oppressions et violences qu'on lui avoit faictes en la prison par les geoliers, et par les autres qu'on avoit faict entrer sus elle.
  Après ses complainctes, survint l'évesque dénommé, auquel elle dist incontinent : "Évesque, je meurs par vous." Et il lui commença à remonstrer, en disant : "Ha ! Jehanne, prenez en patience. Vous mourez pour ce que vous n'avez tenu ce que vous nous aviez promis, et que vous estes retournée à vostre premier maléfice." Et la pouvre Pucelle lui respondit : "Hélas ! si vous m'eussiez mise aux prisons de court d'Eglise , et rendue entre les mains des concierges ecclésiastiques compétens et convenables, cecy ne fust pas advenu : pour quoy je appelle de vous devant Dieu."
  Cela fait , ledit déposant sortit hors, et n'en oyt plus riens."

Sources :
- "Procès de Jeanne d'Arc" - Jules Quicherat - tome II.