Procès de réhabilitation Déposition de Jean Beaupère en 1450

  Vénérable et circonspecte personne, maistre Jehan Beaupère, maistre en théologie, chanoine de Rouen, de l'aage de soixante-dix ans ou environ,

  Dit que au regart des apparicions dont il fait mencion au procès de ladicte Jehanne, qu'il a eu et a plus grant conjecture que lesdictes apparicions estoient plus de cause naturelle et intencion humaine, que de cause sur nature ; toutesfoys de ce principalement se rapporte au procès.
  Item dit que au devant qu'elle fust menée à Saint-Ouen pour estre preschée, au matin, cellui qui parle entra seul en la prison de ladicte Jehanne par congié, et advertit icelle qu'elle seroit tantost menée à l'escherffaut pour estre preschée, en luy disant que s'elle estoit bonne crestienne, elle diroit audit escherfaut que tous ses fais et diz elle mettoit en l'ordonnance de nostre mère saincte Eglise, et en especial des juges ecclésiastiques. Laquelle respondit que ainsi feroit-elle. Et ainsi le dist-elle audit escherfaut, sur ce requise par maistre Nicole Midy ; et ce veu et considéré pour celle foys, elle fut renvoyée après son abjuracion, combien que par aucuns Anglois fut impropéré à l'évesque de Beauvais et à ceulx de Paris qu'ilz favorisoient aux erreurs d'icelle Jehanne.
  Item dit que après telle abjuracion, et qu'elle eust son habit de femme qu'elle receut en ladite prison, le vendredy ou samedy d'après, fut rapporté auxditz juges que ladicte Jehanne se repentoit aucunement d'avoir laissé l'habit d'homme et prins l'habit de femme. Et pour ce Monseigneur de Beauvais, juge, envoya cellui qui parle et maistre Nicole Midy, en espérance de parler à ladicte Jehanne, pour l'induire et ammonester qu'elle persévérast et continuast le bon propos qu'elle avoit eu en l'escherffaut, et qu'elle se donnast de garde qu'elle ne rencheust ; mais ne peurent iceulx trouver cellui qui avoit la clef de la prison ; et ainsi qu'ilz attendoient le garde d'icelle prison, furent par aucuns Anglois estans en la cour dudit chasteau, dictes parolles comminatoires, comme rapporta ledit Midy audit parlant, c'est assavoir que qui les getteroit tous deux dans la rivière, il seroit bien employé. Pourquoy, icelles parolles oyes, s'en retournèrent, et sur le pont dudit chasteau, oyt ledit Midy, comme il le rapporta audit parlant, semblables parolles ou près d'icelles par autres Anglois prononcées ; par quoy les dessus dictz furent espouvantez, et s'en vindrent sans parler à ladicte Jehanne.
  Item dit que, quant à l'innocence d'icelle Jehanne, qu'elle estoit bien subtille de subtillité appartenante à femme, comme lui sembloit ; et n'a point sceu par aucunes parolles d'elle qu'elle fust corrompue de cors.
  Item au regard de sa pénitence finale, n'en sçauroit que dire ; car le lundy d'après l'abjuracion partist de Rouen pour aller à Basle de par l'Université de Paris ; et elle fut condampnée le mercredy ensuivant ; par quoy ne sceut aucunes nouvelles de sa condampnacion, jusques à ce qu'il oyt dire à Lisle en Flandre.

Sources :
- "Procès de Jeanne d'Arc" - Jules Quicherat - tome II.

Notes :
/