Procès de réhabilitation Déposition d'Ysambart de La Pierre en 1450

  Vénérable et religieuse personne, frère Isambert De la Pierre, de l'ordre de Saint-Augustin du convent de Rouen, prebstre, juré et examiné témoin, le V° jour de mars, l'an de grâce mil quatre cens quarante-neuf, dit et dépose qu'une fois, luy et plusieurs autres présens, on admonestoit et sollicitoit ladicte Jehanne de se submettre à l'Eglise. Sur quoy elle respondit, que voulontiers se submettoit au Saint-Père, requérant estre menée à lui, et que point ne se submettroit au jugement de ses ennemis. Et, quant à ceste heure là, frère Isambert lui conseilla de se submettre au [général] concile de Basle, (et) ladicte Jeanne lui demanda que c'estoit que general concile. Respondit cellui qui parle, que c'estoit congrégacion de toute l'Eglise universelle et la chrestienté, et qu'en ce concile y en avoït autant de sa part, comme de la part des Anglois. Cela oy et entendu, elle commença à crier : "O ! puisqu'en ce lieu sont aucuns de nostre parti, je veuil bien me rendre et submettre au concile de Basle." Et tout incontinent, par grant despit et indignacion, l'évesque de Beauvais commença à crier : "Taisez-vous, de par le dyable !" et dist au notaire qu'il se gardast bien d'escrire la submission qu'elle avoit faicte au général concile de Basle. A raison de ces choses et plusieurs autres, les Anglois et leurs officiers menacèrent horriblement ledit frère Isambert, tellement que s'il ne se taisoit, le gecteroient en Seine.
  Item dit et dépose que, après qu'elle eust renoncé et abjuré, et reprins habit d'homme, lui et plusieurs autres furent présens, quant ladicte Jehanne s'excusoit de ce qu'elle avoit revestu habit d'homme, en disant et affermant publiquement que les Anglois lui avoient faict ou faict faire en la prison beaucoup de tort et de violence, quant elle estoit vestue d'habits de femme ; et de fait, la veit éplourée, son viaire plain de larmes, deffiguré et oultraigié en telle sorte que celui qui parle en eut pitié et compassion.
  Item dit et rapporte que devant toute l'assistance, lorsqu'on la réputoit hérectique obstinée et rencheue, elle respondit publiquement : "Si vous, Messeigneurs de l'Eglise, m'eussiez menée et gardée en vos prisons, par advanture ne me fust-il pas ainsi."
  Item dit et dépose que, après l'yssue et la fin de ceste session et instance, ledit seigneur évesque de Beauvais dist aux Anglois qui dehors attendoient : "Farowelle (1), faictes bonne chière, il est faict."
  Item dépose ce tesmoing, que l'on demandoit et proposoit à la povre Jehanne interrogatoires trop difficiles, subtilz et cauteleux, tellement que les grans clercs et gens bien lettrez qui estoient là présens, à grant peine y eussent sceu donner response ; par quoy plusieurs de l'assistence en murmuroient.
  Item dépose icelui tesmoing, que lui mesme en personne , fut pardevers l'évesque d'Avranches (2), fort ancien et bon clere, lequel, comme les autres, avoit esté requis et prié sur ce cas donner son oppinion. Pour ce, ledit évesque interrogua le tesmoing envoyé par devers lui, que disoit et déterminoit monseigneur saint Thomas, touchant la submission que on doit faire à l'église. Et celui qui parle bailla par escript audit évesque la déterminacion de saint Thomas, lequel dit : "Es choses douteuses qui touchent la foy, l'en doit toujours recourir au Pape, ou au général concile." Le bon évesque fut de cette oppinion, et sembla estre tout mal content de la délibéracion que on avait faicte par-deçà de cela. N'a point esté mise par escript la déterminacion ; ce qu'on a laissé par malice.
  Item dépose celui qui parle, que, après sa confession et perception du sacrement de l'autel, on donna la sentence contre elle, et fut déclairée hérectique et excommuniée.
  Item dit et dépose avoir bien veu et clairement apperceu, à cause qu'il a tousjours esté présent, assistant à toute la déduction et conclusion du procez, que le juge séculier ne l'a poinct condamnée à mort, ne à consumpcion de feu ; et combien que le (dit) juge lay et séculier se soit comparu et trouvé au lieu même où elle fut preschée derrenièrement et délaissée à justice séculière, toutesfois, sans jugement ou conclusion dudit juge, a esté livrée entre les mains du bourreau et bruslée, en disant au bourreau tant seulement, sans autre sentence : "Fais ton devoir".
  Item dépose celui qui parle, que ladicte Jehanne eut en la fin si grande contricion et si belle repentance, que c'estoit une chose admirable, en disant parolles si devotes, piteuses et catholiques, que tous ceulx qui la regardoient, en grant multitude, pleuroient à chaudes larmes, tellement que le cardinal d'Angleterre et plusieurs autres Anglois furent contraincts plourer et en avoir compacion.
  Dit oultre plus, que la piteuse femme lui demanda, requist et supplia humblement, ainsi qu'il estoit près d'elle en sa fin, qu'il allast en l'église prouchaine, et qu'il lui apportast la croix, pour la tenir eslevée tout droit devant ses yeux jusques au pas de la mort, afin que la croix où Dieu pendist, fust en sa vie continuellement devant sa vue. Dit oultre, qu'elle estant dedans la flambe, oncques ne cessa jusques en la fin de résonner et confesser à haulte voix le saint nom de Jhesus, en implorant et invocant sans cesse l'ayde des Saincts et Sainctes de paradis ; et encores, qui plus est, en rendant son esperit et inclinant la teste, proféra le nom de Jhesus, en signe qu'elle estoit fervente en la foy de Dieu, ainsi comme nous lisons de saint Ignatius et plusieurs autres martyrs.
  Item dit et dépose que, incontinent après l'exécucion, le bourreau vint à lui et à son compaignon, frère Martin Ladvenu, frappé et esmeu d'une merveilleuse repentance et terrible contricion, comme tout désespéré, craingnant de non savoir jamais impétrer pardon et indulgence envers Dieu, de ce qu'il avoit faict à ceste saincte femme. Et disoit et affermoit ledit bourreau que, nonobstant l'huile, le soufre et le charbon qu'il avoit appliquez contre les entrailles et le cueur de ladite Jehanne, toutesfoys il n'avoit pu aucunement consommer ne rendre en cendres les breuilles ne le cueur ; de quoy estoit autant estonné comme d'un miracle tout évident."

Sources :
- "Procès de Jeanne d'Arc" - Jules Quicherat - tome II.

Notes :
1 C'est le mot anglais Farewell

2 Il s'appelait Jean de Saint-Avit, d'abord abbé de Saint-Denis, puis appelé au siège épiscopal d'Avranches vers l'an 1390. En 1432, malgré son grand âge, il fut incarcéré à Rouen, ayant encouru le soupçon d'avoir voulu livrer cette ville aux Français. Mort en 1442. (Gallia Chrisliana, t.XI, col. 493)